Ötən gün, avqustun 25-də Azərbaycan hərbçiləri Ermənistanı İranla birləşdirən Gorus-Qafan yolunun bir hissəsini bağlayıb.
Ermənistan mətbuatı yazır ki, bu barədə Ermənistan Milli Təhlükəsizlik Xidmətinin mətbuat mərkəzi məlumat yayıb.
“Avqustun 25-də saat 23:00 radələrində Azərbaycan tərəfi Qafan-Gorus dövlətlərarası yolun Dərbənd-Şurnux hissəsini bağlayıb. Yolun açılması, insanların və nəqliyyat vasitələrinin normal hərəkətinin bərpası üçün işlər davam etdirilir”, - deyə Ermənistan Milli Təhlükəsizlik Xidmətinin yaydığı açıqlamada qeyd olunur.
Ermənistanın ombudsmanı Arman Tatoyan isə dərhal özünü əraziyə çatdırıb. O, hadisə ilə bağlı beynəlxalq təşkilatlara məlumat göndərdiyini açıqlayıb.
Qeyd edık ki, söhbət işğal dövründə Ermənistanın Azərbaycan ərazisindən çəkdiyi Qafan-Gorus avtomobil yolunun bağlanmasından gedir. 10 noyabr razılaşmasından sonra Azərbaycan tərəfi yolun ölkəmizin ərazisindən keçən 20.km-ə.yaxın hissəsindən ermənilərin istifadəsinə icazə vermişdi. Bu barədə Prezident İlham Əliyev də çıxışlarında məlumat verib.
Dünən axşamdan Azərbaycan sərhədçiləri hər iki tərəfdən yolu gediş-gəliş üçün bağlayıblar. Ermənistan Müdafiə Nazirliyi və Rusiya sərhədçilərinin iştirakı ilə aparılan danışıqlardan sonra Azərbaycan tərəfi yolda qalan maşınların çıxmasına icazə verib. Lakin yolu açmayıb.
Xatırladaq ki, 25 avqust tarixində saat 15:45 radələrində Gorus-Qafan yolunun Qubadlı rayonunun Aşağı Cibikli kəndi yaxınlığından keçən hissəsi istiqamətində yerləşən Dövlət Sərhəd Xidmətinin Sərhəd Qoşunlarının “Qubadlı” əlahiddə sərhəd diviziyasının sərhəd-döyüş məntəqəsinin ərazisində xidmətdə olan əsgər Şirəliyev Ruslan Nəriman oğlu Ermənistan Silahlı Qüvvələrinin 2 hərbi qulluqçusunun qəfil hücumuna məruz qalmış, əlbəyaxa döyüş zamanı sinə nahiyəsindən süngü bıçaqla xəsarət almışdır.
Digər sərhəd naryadlarının köməyə gəldiyini görən Ermənistan hərbçiləri ərazinin sıx meşəlik olmasından istifadə edərək geri qaçmışlar.
Əsgər R.Şirəliyev təcili olaraq Dövlət Sərhəd Xidmətinin hərbi hospitalına təxliyə edilmişdir, hazırda həyatı üçün təhlükə yoxdur.
"Baş vermiş hadisəyə görə bütün məsuliyyət Ermənistan tərəfinin üzərinə düşür və bu təxribata adekvat cavab veriləcəkdir" - deyə, DSX-nın məlumatında bildirilirdi.
Ola bilsin, Azərbaycan Gorus-Qafan yolunu ermənilərin təxribatına cavab olaraq bağlayıb.
Elman
"AzPolitika.info"
