CHP-nin prezidentliyə namizədi Müharrem İncə Kahramanmaraşda keçirdiyi mitinqdə Prezident Ərdoğana və sabiq baş nazir Tansı Çillərə sərt mesajlar verib.
Xeberdar.net Türkiyə mətbuatına istinadən bildirir ki, İncə Ərdoğanı nəzərdə tutaraq “İncə ilə dava etdi, İncə yüksəlir. Dava yox, dərhal barışacağıq. Bu xalqa axşam-sabah efirlərdə dava edən deyil, yol göstərən prezident lazımdır” deyib.
Prezidentliyə namizəd əlavə edib ki, Türkiyə dövlətinin idarəetməsinə yeni qan, yeni ad lazımdır: “Biz dünyada baş verən texnoloji dəyişikliyi yaxalaya bilməsək, 100 il kasıb qalacağıq. Mən meydanlarda haqq, hüquq, ədalət deyirəm, biri də çıxmış çay, kökə deyir”.
O, bundan sonra mitinqdə Ərdoğana çağırış edərək deyib ki, “Gəl, mənimlə telekanalda debata çıx”.
Daha sonra isə ötən gün Ərdoğanın keçirdiyi mitinqə dəstək üçün gələn sabiq baş nazir Tansı Çillərə sərt ismarıc göndərib: “Dünən bir də baxdım, Tansu Çillər də mitinqə gedib. Ərdoğan bir yandan 90-cı illəri pisləyir, digər yandan 90-ların adamlarını mitinqinə dəvət edib, dəstək istəyir. Onun xisləti budur. Zatən Tansu Çillər uğurlu biri olsaydı, öz partiyasını (DYP – Doğru Yol Partiyası) qaldırardı da”.
