Azərbaycan Baş Prokurorluğu martın 15-də istefada olan ordu general-leytenantı, Azərbaycanın Milli Qəhrəmanı Rövşən Əkbərovun həbs edildiyi barədə məlumat yayıb. Həbsin səbəbləri barədə daha sonra məlumat veriləcək, deyə Baş Prokurorluğun mətbuat xidməti bildirib.
Bu, həbsin tələsik həyata keçirildiyini və formal da olsa, ittihamın tam formalaşdırılmadığını göstərə bilər.
Hələlik KİV-ə Əkbərovun qəsdən adam öldürməkdə ittiham edildiyi barədə məlumat sızdırılıb.
Əkbərov səs-küyə səbəb olan bir qətllə əlaqələndirilir. Bu, 2001-ci ildə baş vermiş, generalın əsas şübhəli olduğu köhnə hadisədir. Mayın 31-dən iyunun 1-nə keçən gecə Kiyevdə səs-küy doğuran qətl baş verib. Biznesmen Elçin Əliyev Kiyevdə bir kafedə kortiklə öldürülüb.
Şahid olduğu ehtimal edilən Məzahir Şıxəliyev və mərhumun anası Səmayə Əliyeva qətldən sonra qatilin Rövşən Əkbərov olmasında israr edirdilər.
Rövşən Əkbərov qətldə əli olduğunu təkzib edirdi.
Həmin vaxt bu hadisə ört-basdır edilmişdi. Bəlkə də, Əkbərovun 1994-1995-ci illərdə Gəncədə və Bakıda OMON-çuların (xüsusi təyinatlı milis dəstəsinin üzvlərinin) qiyamının yatırılmasında xidmətlərini nəzərə alıblar, bu xidmətlərə görə ona Milli Qəhrəman adı verilmişdi.
Amma generalın həbsinə, çətin ki, 20 ildir bütün ölkənin xəbəri olan bu hadisə səbəb olsun.
Birinci Qarabağ müharibəsinin iştirakçısı, 4 saylı Bakı Ordu Korpusunun komandanı, 1994-cü ilin yazında Tərtər yaxınlığında erməni ordusunun məğlub edilməsində mühüm rol oynamış 777-ci motoatıcı alayın komandiri 55 yaşlı Rövşən Əkbərov ötən il 44 günlük müharibədə iştirakdan kənarlaşdırılıb. Bu, qəribə deyil? O, dekabrın 8-də Zəfər Paradında iştirak edən generallar arasında da yox idi. Mükafat alanlar siyahısında onun adı yox idi. Dekabrın 10-da isə o, KİV-ə ordudan xaric edildiyini etiraf edib. “Mən çoxdan Silahlı Qüvvələrin tərkibində deyiləm və indi tamamilə başqa bir işlə məşğulam”, deyə o, jurnalistə etiraf edib.
Qeyd etmək lazımdır ki, 44 günlük müharibənin ilk günlərində Əkbərovla dost münasibətləri olan Nəcməddin Sadıqov Baş Qərargah rəisi vəzifəsindən kənarlaşdırılıb. Dekabrın 12-də isə Sadıqovun bacısı oğlu, Azərbaycan Müdafiə Nazirliyinin Daxili Təhlükəsizlik Baş İdarəsinin rəisi, general-mayor Ramil Əsgərov tutduğu vəzifədən azad edilib.
Demokrat.az saytının məlumatına görə, 2020-ci ilin dekabrında Rövşən Əkbərov Kiyevə köçüb, orada bir sıra kommersiya obyektləri – Kiyevdə Dnepr sahilində Obolon rayonunda yerləşən “Desant” və “Köhnə Corat” restoranlarını, Kiyev şəhəri, Obolon küçəsi, 1B ünvanında 250 kvadrat metrlik bahalı mənzil, habelə Dream Town ticarət mərkəzində bir neçə ofis alıb.
Müdafiə naziri Zakir Həsənovun Rövşən Əkbərovun ehtiyata buraxılması haqqında əmri 8 fevral 2021-ci ildə imzalaması da kifayət qədər qəribədir. Eyni zamanda general-mayor Xaqani Cəbrayılov da ehtiyata göndərilib. 2015-ci ildə bu iki general yerlərini dəyişmişdi – Əkbərov Şəmkir korpusuna rəhbərliyi Cəbrayılov təhvil vermişdi, özü isə onun yerinə Bakı korpusunun komandiri vəzifəsinə keçmişdi.
Bütün bunlar generalın həbsinin siyasi aspekti haqqında versiyanın inkişafına səbəb ola bilər.
Contact.az
