Polis Tbilisidə müxalifətin parlament qarşısında keçirdiyi aksiyasını dağıdıb.
Tbilisidə etirazçılar Gürcüstan parlamentində proporsional seçki sisteminə keçidlə bağlı qanun layihəsinin uğursuzluğundan sonra hakimiyyətin istefa verməsini və növbədənkənar seçkilərin keçirilməsini tələb edirlər.
Polis aksiyanı dağıtmaq üçün su şırnağından istifadə edib, aksiyaçıların qurduğu çadırları dağıdıb.
Gürcüstan Daxil İşlər Nazirliyi bildirib ki, polisin tələblərinə tabe olmayan və xuliqanlığa görə 37 adam saxlanıb.
Dördü aksiyaçı, 2-si hüquq-mühafizə orqanları əməkdaşı olan 6 nəfər yaralanıb.
Aksiya təşkilatçıları yeni etirazların olacağını deyiblər.
"Etiraz davam edəcək. Gürcüstan vətəndaşlarının və cəmiyyətinin başqa yolu yoxdur", Vahid Milli Hərəkat partiyasından Khatia Dekanoidze bildirib.
Aksiyada nə baş vermişdi?
Aksiya iştirakçıları və müxalifət liderləri parlament binasının qarşısında çadırlar qurub və binanın darvazalarına simvolik qıfıllar taxmışdılar. Etirazçılar parlamentə etiraz edəcəklərini və hakim partiyanın deputatlarının binaya girişinə imkan verməyəcəklərini deyiblər.
""Gürcü arzusu" partiyasının heç bir deputatı bu binanın hər hansı bir qapısından içəri daxil olmayacaq", - müxalif "Avropa Gürcüstanı" partiyasının liderlərindən biri Gigi Ugulava deyib.
"Əgər parlament kifayət etməyəcəksə, sonrakı katiblik, şəhər meriyası, digər şəhərlər, rayon mərkəzləri olacaq. Növbədənkənar proporsional seçkilər elan olunanadək "Gürcü arzusu" partiyasının heç bir nümayəndəsi hər hansı hökuməıt binasına daxil ola bilməyəcək", - Gigi Ugulava əlavə edib.
PIolis etirazların ikinci gününü də çadırlarda gecələməyə çalışan etirazçılara izn verməyib.
Gürcüstanda müxalifət və cəmiyyətin etirazları noyabrın 14-də parlamentdə 2020-ci ildə proporsional seçki sisteminə keçidlə bağlı konstitusiya dəyişikliyinin uğursuzluğundan sonra başlayıb.
Müvəqqəti hökumət və növbədənkənar seçkilər
Parlamentdə səsvermədən və konstitusion dəyişikliklərin uğursuzluğundan sonra müxalif partiyalar gələcək planların müzakirəsi üçün müxalif partiyalardan birinin ofisində görüşürdülər.
Müxalifətçilər planlarını vətəndaş cəmiyyətinin fəalları ilə də razılaşdıracaqlar. Onlar çadırlar quraşdıraraq Rustaveli prospektində hərəkəti dayandırıblar.
Etirazçılar proporsional seçki sistemi ilə növbədənkənar seçkilərin keçirilməsini və hökumətin istefasını tələb edirlər. Bu tələbləri etirazlar zamanı "Yeni Gürcüstan" partiyasının lideri Georgi Vaşadze səsləndirmişdi.
O, bunu hökumətə irəli sürüləcək ultimatum adlandırıb və parlament binasının qarşısında toplaşan etirazçılardan bu tələbə razılıq əlaməti olaraq əl qaldırmağı xahiş edib.
Georgi Vaşadzenin sözlərinə görə, onlar növbədənkənar seçkilər və hökumətin istefasından başqa növbəti seçkilərin keçirilməsi üçün müvəqqəti hökumətin qurulmasını və Tbilisidə 20 iyul hadisələri ilə bağlı saxlananların sərbəst buraxılmalarını tələb edirlər.
"Bizim qələbə planımız var. Biz, yekun qələbəyə çatmaq üçün bu gün, sabah və sonrakı gün nə etməli olduğumuzu bilirik", - George Vaşadze deyib.
Qanun layihəsinin uğursuzluğu o deməkdir ki, Gürcüstan proporsional seçki sisteminə 2024-cü ildən keçəcək, gələn ilki parlament seçkiləri isə qarışıq sistemlə keçiriləcək. Seçicilər 77 deputatı proporsional, 73 deputatı isə majoritar seçki sistemi ilə seçəcək./BBC/
