Türkiyənin Samsun şəhərində ABŞ-ın Ankaradakı səfirliyinə hücum hazırlamaqda şübhəli bilinən 4 nəfər saxlanılıb.
“Report” “Haber7”yə istinadən xəbər verir ki, onların terrorçu İŞİD qruplaşmasının üzvü olduqları iddia edilir.
Məlumata görə, onlar İraq vətəndaşlarıdır. Qeyd edək ki, martın 5-də ABŞ-ın Türkiyədəki səfirliyinin terror təhlükəsi ilə bağlı yaydığı xəbərdarlıqdan sonra Ankarada İŞİD terrorçularına qarşı əməliyyat keçirilib və 12 nəfər tutulub. Bildirilib ki, 20 şübhəlinin tutulması istiqamətində əməliyyat keçirilib. Onlardan 12-si tutulub. Aniterror əməliyyatı davam edir.
Xatırladaq ki, martın 5-də ABŞ-ın Ankaradakı səfirliyi fəaliyyətini bir günlüyə dayandırıb. Bu addımın təhlükəsizlik məqsədilə atıldığı bildirilib.