"Noyabrın 2-də Qaradağ rayonunda 2 nəfərin ölümü, 1 nəfərin yaralanması ilə nəticələnən növbəti bu cür ağır yol-nəqliyyat hadisəsi baş verib".
Lent.az-ın məlumatına görə, bu barədə Baş Dövlət Yol Polisi İdarəsinin yaydığı müraciətdə bildirilir:
"Saat 4:30-da Bakı-Qazax-Gürcüstan avtomobil yolunun Qaradağ rayonu, Qobustan qəsəbəsi ərazisindən keçən 59,8-ci kilometrliyində 41 yaşlı Abıyev Seymur Abı oğlu idarə etdiyi “Ford Transit” markalı yük-sərnişin avtomobili ilə Bakı şəhəri istiqamətində hərəkətdə olarkən eyni istiqamətdə qarşıda hərəkətdə olan 40 yaşlı Güləliyev Mehman Telman oğlunun idarə etdiyi “Howo” markalı yük avtomobilinin arxa hissəsinə toxunaraq onunla toqquşub.
Qəza nəticəsində “Ford” markalı nəqliyyat vasitəsində olan sərnişinlər - 58 yaşlı İsmayılova İradə Balaxan qızı, 46 yaşlı Aşurova Əhliqə Ağasəf qızı ölüb, 61 yaşlı Məhərrəmova Sulduzə Həsən qızı xəsarət alaraq xəstəxanaya daxil olub. İlkin məlumata görə, hadisənin baş verməsinə “Ford” markalı avtomobilin sürücüsünün sükan arxasında yuxulaması səbəb olub.
Son vaxtlar ölümlə nəticələnən ağır yol-nəqliyyat hadisələri üzrə aparılan araşdırmalar göstərir ki, bir çox qəzalara sürücülərin sükan arxasında yuxulaması səbəb olur. Təəssüf ki, sükan arxasına keçən şəxslər bu kimi məqamlara diqqətsizlik etməklə yalnız özlərinin deyil, digər hərəkət iştirakçılarının da həyatını təhlükəyə atırlar".
Baş Dövlət Yol Polisi İdarəsi, belə ağır nəticəli yol-nəqliyyat hadisələrinin yaşanmaması üçün bir daha sürücülərdən iş və istirahət rejiminə düzgün əməl etməyi, yorğun, yuxulu, əzgin halda, dərman preparatlarının təsiri altında sükan arxasına əyləşməməyi xahiş edir. Mümkün qədər hər 2-3 saatlıq fasiləsiz hərəkətdən sonra qısa müddətə də olsa, avtomobilinizi saxlayıb istirahət edin. Bunun üçün respublika əhəmiyyətli yollarda yerləşən DYP-nin stasionar postlarında yaradılan şəraitdən istifadə edə bilərsiniz.
Xeberdar.net
