Paytaxta giriş vizası — "Xoş gəldin, cibində pul varsa.”

Hər an ən çətin savaşa hazır olmalıyıq-ZƏLİMXAN MƏMMƏDLİ YAZIR

“Qeyri-səlis məntiq və dil-nitq” elmimizə nələr verdi?

Elşad Abdullayevin erməniləri maliyyələşdirən oğlu niyə Azərbaycana ekstradisiya olunmur?

Elman Pənahov: "Bu qanun daha çox problemlərin yaranması ilə müşaiyət olunacaq"

Vaqif Osmanlı: "Sözüylə, şəxsiyyətiylə sözü məğrur çinar kimi ucaldanlar ölməzdir"

"Ümummilli Lider Heydər Əliyevin uzaqgörən siyasəti nəticəsində “Müstəqilliyimiz əbədidir, dönməzdir” şüarı xalqımızın milli ideyasına çevrildi." - Şahin Seyidzadə

91 2-10-2025, 09:30 siyaset

"Ümummilli Lider Heydər Əliyevin uzaqgörən siyasəti nəticəsində “Müstəqilliyimiz əbədidir, dönməzdir” şüarı xalqımızın milli ideyasına çevrildi." - Şahin Seyidzadə
Azərbaycan xalqının müasir dövlətçilik tarixində mühüm dönüm nöqtələrindən biri 1993-cü il 3 oktyabr tarixidir. Həmin gün ümumxalq seçkilərində Ümummilli Lider Heydər Əliyevin Azərbaycan Respublikasının Prezidenti seçilməsi müstəqilliyimizin qorunması, dövlətçiliyimizin bərpası və milli kimliyimizin yaşadılması baxımından taleyüklü əhəmiyyət kəsb etdi. Bu tarixi hadisə Azərbaycan dövlətinin dağılmaq təhlükəsindən xilas edilməsinə, müstəqilliyin dönməz və əbədi xarakter almasına yol açdı. Azərbaycan xalqı əsrlər boyu zəngin dövlətçilik ənənələri formalaşdırmışdır. Lakin XX əsrin sonlarında müstəqilliyini yenidən bərpa edən Azərbaycan 1991–1993-cü illərdə böyük sınaqlarla üz-üzə qaldı. Gənc respublikanın siyasi institutları zəif, iqtisadi sistemi dağılmış, idarəçilik böhranı dərin idi. Ermənistanın təcavüzü nəticəsində torpaqlarımız işğal olunur, ölkə daxilində separatizm güclənirdi. Belə bir şəraitdə dövlətçiliyin süqutu təhlükəsi real idi. 1993-cü ilin iyununda xalqın tələbi ilə Ümummilli Lider Heydər Əliyevin hakimiyyətə qayıdışı, oktyabrın 3-də isə Prezident seçilməsi məhz bu təhlükəni aradan qaldırdı. Ümummilli Liderin rəhbərliyi ilə Azərbaycan qədim dövlətçilik ənənələrinə söykənərək müasir, müstəqil dövlətin möhkəmləndirilməsi yoluna qədəm qoydu. 1991-ci ildə elan olunmuş dövlət müstəqilliyi dərin böhran və daxili çəkişmələr səbəbindən real məzmun kəsb etmirdi. Ümummilli Lider Heydər Əliyev isə Prezident seçildiyi gündən müstəqilliyi yalnız bəyanat səviyyəsindən çıxarıb dövlətçilik ideyasına çevirdi. Onun rəhbərliyi ilə qəbul edilən siyasi qərarlar, atılan addımlar nəticəsində Azərbaycan xalqı öz müstəqilliyinin əbədiliyinə inam qazandı. 1995-ci ildə qəbul edilmiş Azərbaycan Respublikasının Konstitusiyası müstəqilliyin hüquqi əsasını möhkəmləndirdi, dövlətin ali məqsədlərini müəyyənləşdirdi. Ümummilli Lider Heydər Əliyevin uzaqgörən siyasəti nəticəsində “Müstəqilliyimiz əbədidir, dönməzdir” şüarı xalqımızın milli ideyasına çevrildi. Dövlətçiliyin möhkəmləndirilməsinin əsas şərtlərindən biri hüquqi dövlət quruculuğu idi. Ümummilli Lider Heydər Əliyev qanunun aliliyini təmin etməyi dövlət siyasətinin prioritetinə çevirdi. Cinayətkarlığın qarşısı alındı, dövlət orqanları arasında səlahiyyət bölgüsü dəqiq müəyyən edildi, məhkəmə-hüquq islahatlarının əsası qoyuldu. Ən mühüm addımlardan biri 1995-ci ildə qəbul edilən Konstitusiyada hüquq və azadlıqların beynəlxalq standartlara uyğun təsbit olunması idi. Bu, Azərbaycanı hüquqi dövlət quruculuğu istiqamətində yeni mərhələyə çıxardı. Müstəqilliyin qorunması güclü ordunun yaradılmasından asılı idi. 1993-cü ildən etibarən Ümummilli Lider Heydər Əliyev nizami Azərbaycan Ordusunun formalaşdırılmasını dövlətin başlıca vəzifəsi elan etdi. Ümummilli Lider orduda vahid komandanlıq prinsipini bərpa etdi, kadr islahatları apardı, silahlı qüvvələrdə intizamı möhkəmləndirdi. 1994-cü ildə atəşkəsin əldə olunması Azərbaycan Ordusunun yenidən təşkilatlanması və gələcək qələbələr üçün möhkəm zəmin yaratdı. Ümummilli Lider Heydər Əliyev müstəqil dövlətin ideoloji təməlini də müəyyənləşdirdi. Onun əsasını azərbaycançılıq təşkil edirdi. Bu ideya bütün azərbaycanlıların vahid dövlət ətrafında birləşməsini, milli həmrəyliyi, dilimizin, mədəniyyətimizin və milli-mənəvi dəyərlərimizin qorunmasını nəzərdə tuturdu. Azərbaycançılıq ideyası dövlətçilik siyasətində milli identikliyin qorunması, eyni zamanda müasir dünyaya inteqrasiyanın əsas dayağı oldu. Bu ideologiya bu gün də Azərbaycanın inkişaf yolunu müəyyənləşdirən ideya-siyasi bazadır. Dövlətin möhkəmləndirilməsi üçün ilk növbədə daxili sabitlik vacib idi. Ümummilli Lider Heydər Əliyevin Prezident seçilməsindən sonra ölkədə vətəndaş qarşıdurmasının qarşısı alındı, parçalanma təhlükəsi aradan qaldırıldı. Ümummilli Liderin “mən hamının prezidentiyəm” prinsipi əsasında həyata keçirdiyi siyasət xalqın müxtəlif təbəqələrini, siyasi qüvvələri vahid milli məqsəd ətrafında birləşdirdi. Bu siyasət dövlətin dayaqlarını möhkəmləndirdi, vətəndaşların dövlətə inamını bərpa etdi. Dövlətçiliyin möhkəmlənməsi yalnız siyasi deyil, iqtisadi dayaqlardan da asılı idi. Ümummilli Lider Heydər Əliyev ilk gündən iqtisadiyyatın bərpası, bazar münasibətlərinə keçid və xarici sərmayələrin cəlb olunması istiqamətində mühüm addımlar atdı. Ən böyük nailiyyət isə 1994-cü ilin sentyabrında imzalanmış “Əsrin müqaviləsi” oldu. Bu müqavilə Azərbaycanın iqtisadi müstəqilliyinin təmin olunmasına, milli dövlətçiliyin möhkəmlənməsinə xidmət etdi. Dövlətçiliyin mühüm dayaqlarından biri də xarici siyasət idi. Ümummilli Lider Heydər Əliyev tarazlaşdırılmış, çoxvektorlu xarici siyasət həyata keçirərək Azərbaycanın beynəlxalq nüfuzunu möhkəmləndirdi. O, ölkəmizin müstəqilliyini beynəlxalq aləmdə tanıtmaqla yanaşı, regionda aparıcı dövlətə çevrilməsi üçün möhkəm zəmin yaratdı. Azərbaycan BMT, ATƏT, İslam Əməkdaşlıq Təşkilatı və digər nüfuzlu qurumlarda fəal iştirak etməyə başladı. Bu isə müstəqil dövlətimizin beynəlxalq təhlükəsizlik sistemində özünə layiqli yer tutmasına imkan verdi.
Beləliklə, 3 oktyabr 1993-cü il seçkiləri Azərbaycan dövlətçiliyinin möhkəmlənməsi yolunda taleyüklü mərhələ oldu. Ümummilli Lider Heydər Əliyevin Prezident seçilməsi ilə müstəqilliyimiz real məzmun qazandı, dövlətçilik ənənələri bərpa olundu, hüquqi dövlətin əsası qoyuldu, ordu quruculuğu təmin edildi, iqtisadi inkişafın təməli atıldı, Azərbaycançılıq ideologiyası dövlətin əsas dayağına çevrildi. Bu gün Azərbaycan Respublikasının möhkəm, güclü və nüfuzlu dövlət kimi mövcudluğu məhz 1993-cü ilin 3 oktyabrında xalqın öz xilaskar liderinə verdiyi etimadın bəhrəsidir.

Milli Məclisin Deputatı
Şahin Seyidzadə


Xəbərin müəllifi: Mirzə Mirzəli

XƏBƏR LENTİ