Pakistan və Əfqanıstan arasında rəsmi şəkildə başlayan hərbi qarşıdurma nəticəsində ölənlərin sayının 200-ü keçdiyi bildirilir. Hər iki tərəfin yaydığı açıqlamalara görə, döyüşlərin intensivliyi artmaqda davam edir.
Sərhəddə qarşılıqlı hücumlar
İki ölkə arasında sərhəd xətti hesab olunan Durand xətti boyunca qarşılıqlı hücumlar davam edir. Taliban Pakistan sərhədində 15 hərbi postu ələ keçirdiyini iddia edib.
Talibanın yaydığı məlumatda bildirilir ki, cavab əməliyyatları zamanı 55 Pakistan əsgəri öldürülüb, 23 hərbçinin cəsədi və xeyli sayda silah-sursat ələ keçirilib. Əfqanıstan hökumətinin sözçüsü Həmdullah Fitrət də bu məlumatları təsdiqlədiklərini bəyan edib. Onun sözlərinə görə, Pakistan ordusunun bir qərargahı və 19 nəzarət-buraxılış məntəqəsi də ələ keçirilib.
Pakistan tərəfinin açıqlaması
Pakistanın İnformasiya naziri Attaullah Tarar ABŞ mərkəzli X sosial media platformasında paylaşdığı açıqlamada bildirib ki, əməliyyatlar zamanı 133 əfqan əsgəri öldürülüb, 200-dən çox hərbçi isə yaralanıb.
Nazirin sözlərinə görə, Kabil, Paktiya və Qəndəhar vilayətlərində bir sıra hədəflər vurulub. O, ölənlərin sayının arta biləcəyini istisna etməyib. Tarar həmçinin 27 mövqenin məhv edildiyini, 9 məntəqənin ələ keçirildiyini, iki korpus və üç briqada qərargahı da daxil olmaqla çoxsaylı hərbi obyektin, eləcə də 80-dən artıq texnika və silahın sıradan çıxarıldığını iddia edib.
“Artıq aramızda açıq müharibə var”
Pakistanın müdafiə naziri Xavaca Məhəmməd Asif X platformasındakı paylaşımında bildirib ki, NATO qüvvələrinin Əfqanıstandan çıxarılmasından sonra ölkədə sabitliyin təmin olunacağı gözlənilirdi. O iddia edib ki, Taliban Əfqanıstanı Hindistanın regional maraqlarına uyğun istiqamətə yönəldib.
Nazir əlavə edib ki, Pakistan “normallığı qorumaq” üçün diplomatik səylər göstərsə də, artıq səbr tükənib: “Hazırda aramızda açıq müharibə gedir”.
Hadisələrin fonu
Pakistan İnformasiya Nazirliyi ölkədə baş verən son bombalı hücumlardan sonra sərhəd bölgəsində “terror düşərgələri” kimi xarakterizə etdiyi yeddi obyektin hədəf alındığını açıqlayıb.
Əfqanıstan Müdafiə Nazirliyi isə Pakistana " Müvafiq cavab veriləcəyini" bəyan edib. Əfqanıstan Qızıl Aypara Cəmiyyəti Pakistanın hücumları nəticəsində 18 nəfərin öldüyünü, çox sayda insanın yaralandığını açıqlayıb.
Pakistanın daxili işlər üzrə dövlət naziri Talal Çaudri bildirib ki, sərhəddə keçirilən əməliyyatlar zamanı 70-ə yaxın silahlı şəxs zərərsizləşdirilib.
Pakistanın hədəf aldığı 7 məntəqədən sonra Əfqanıstan hökuməti Kabildə fəaliyyət göstərən Pakistan səfirini Xarici İşlər Nazirliyinə çağıraraq etiraz notası təqdim edib.
/SonDakika.com/